As TICs no tecido empresarial

BOLETÍN TECNOLÓXICO

2007-07-27T10:49:00.000+01:00

A Asociación de Empresarios do Polígono Industrial do Salnés xunto coa Rede de Dinamización da Sociedade da Información, ten o pracer de, a partir de agora, enviarlle unha serie de boletíns tecnolóxicos onde se poderán tratar temas de gran interese tanto para a súa vida profesional como persoal. Abarcarán contidos cotiás, de gran utilidade, sen outro obxectivo que o de facilitar o acercamento do empresariado á Sociedade da Información e difundir as utilidades das Novas Tecnoloxías.

O primeiro número xa foi enviado por correo electrónico e tiña por título Skype: chamadas telefónicas de baixo custe a teléfonos de todo o mundo.

O seguinte número, que recibirán a semana próxima será acerca de WINZIP E WINRAR: compresión e descompresión de arquivos.

E así seguiremos a enviar máis boletíns con asuntos realmente suxestivos e importantes e que esperamos lle resulten satisfactorios e proveitosos.

Agradecer enormente á compañeira dinamizadora da Asociación de Empresarios de Culleredo a súa información acerca desta iniciativa posta en marcha.

Se ten calqueira dúbida acerca destes boletíns e no que neles se trata así como calqueira outra cuestión non dubide en poñerse en contacto con nós na Asociación de Empresarios, tanto na nosa sede así como a través do teléfono ou correo electrónico habitual.

OBRADOIRO NIVEL USUARIO POWER POINT

2007-06-05T11:01:00.000+01:00

ABERTO O PRAZO DE INSCRIPCIÓN PARA O NOVO OBRADOIRO A NIVEL USUARIO DE POWER POINT

Xa é posible anotarse a este novo obradoiro, todas as empresas están informadas desta actividade, polo que só hai que acudir á Asociación de Empresarios a apuntarse, ou ben mandar un correo electrónico ou chamar por teléfono, como sempre.

Este programa está indicado para realizar as transparencias que se realizan nas presentacións.

Os contidos que se tratarán son os seguintes: pasos axeitados para preparar unha boa presentación, regras prácticas para a elaboración das transparencias, crear formatos, deseños e efectos para presentacións, etc.

Esta actividade se desenvolvería de 20 a 21:30 horas, aproximadamente, logo da xornada laboral, os días martes e xoves, dando comezo o martes 19 de xuño e rematando o xoves 28 deste mesmo mes.

POR FIN PODEMOS VISITAR A PÁXINA WEB DA REDE DE DINAMIZACIÓN

2007-06-05T10:41:00.000+01:00

XA EXISTE UNHA PÁXINA WEB OFICIAL DA REDE DE DINAMIZACIÓN

Xa é unha realidade, despois de tantos meses de espera, a páxina web oficial da Rede de Dinamización da Sociedade da Información xa é pública e visible.

Nesta páxina poderase atopar todas as novas relativas á Rede de Dinamización e á Sociedade da Información en xeral e , en particular, accedendo mediante ás miniwebs, a cada entidade que está dentro desta Rede. Deste xeito, calquera nova que teña que ver coa Asociación de Empresarios do Polígono Industrial do Salnés e o seu proxecto de Dinamización aparecerá na miniweb, á que se chega, logo de estar na páxina principal : dinamiza.sociedadedainformacion.eu/web , logo de entrar en Centros da Rede e buscar na provincia de Pontevedra a A sociación de Empresarios do Parque do Salnés.

Só queda dicir que, a parte deste blog, esta páxina é outra maneira de estar informado sobre a Rede de Dinamización da Sociedade da Información tanto na Asociación de Empresarios do Polígono Industrial do Salnés como no resto da comarca ou como, incluso, en toda a comunidade galega.

2007-06-01T08:29:00.000+01:00

OFERTA CURSOS DE FORMACIÓN ESPECÍFICA GRATUITOS

A Dirección Xeral de Promoción Industrial e da Sociedade da Información da Consellería de Innovación e Industria da Xunta de Galicia e a Sociedade Anónima Xestión Centro de Supercomputación de Galicia (S.A.X CESGA) a través da Rede de Dinamización da Sociedade da Información e da Asociación de Empresarios do Polígono Industrial do Salnés, quere levar a cabo unha intervención formativa específica para PEMES e microPEMES .

A intención é mellorar os parámetros produtivos e sociais das empresas galegas introducindo e afondando no uso das ferramentas de software libre máis implantadas e complementándose coa formación en áreas menos desenvolvidas, pero de interese estratéxico para a mellora da súa competitividade.

Para acadar estes obxectivos cóntase co apoio dunha empresa especializada no campo da formación en software libre e coa Rede de Dinamización da Sociedade da Información que será a encargada de levar a oferta de cursos de formación ás empresas.

Xa se enviaron os correspondentes escritos así como se adxuntou a oferta formativa completa, así que só falta apuntarse.

Recordar que se teñen que forman grupos de entre 15 e 20 persoas, doutro xeito non será posibible realizar esta actividade. O prazo máximo de apuntarse ós mesmos remata o día 13 de xuño. Como sempre pode anotarse a éstes chamando por teléfono á Asociación de Empresarios (986 544 078), personándose nas súas oficinas ou mandando un correo electrónico (asociacion@poligonodelsalnes.com).

Esta é unha oportunidade excelente para obter uns coñecementos máis profundos sobre certos programas.

DÍA DAS LETRAS GALEGAS, DÍA DE INTERNET, DÍA MUNDIAL DAS TELECOMUNICACIÓNS E DA SOCIEDADE DA INFORMACIÓN

2007-05-07T11:38:00.000+01:00

17demaio.salnes.gal

O próximo día 17 de maio, como todos e todas sabedes é o Día das Letras Galegas, o cal, este ano, se lle adica a María Mariño. Pero o que quizais non sabedes é que ademais tamén é o Día de Internet e o Día Mundial das Telecomunicacións e da Sociedade da Información.

Para conmemorar este día e todas estas celebracións, ó longo de todo o mes, dende a Xunta de Galicia e a Consellería de Innovación e Industria, en colaboración con diferentes entidades, asociacións, organismos, etc, vanse producir diversas actividades en puntos diferentes da xeografía galega. estas actividades son de tipo moi distinto, abarcando temáticas variadas, dende o software libre ata conferencias sobre o desenvolvemento da Sociedade da Información, emisións radiofónicas... Para poder ter unha mellor información respeto a esta iniciativa tan interesante podedes consultar a páxina web oficial que se fixo con motivo desta campaña de difusión e promoción. A páxina é a seguinte: www.maisinternetmaisgalego.org

Por outra parte, dende a Rede de Dinamización, tamén se porán en práctica diferentes actividades dirixidas a estas celebracións. Cada dinamizador/a, ou tamén por equipos, como é o caso do Salnés, planificará actividades para desenvolver no seu lugar de traballo. Da man dos meus compañeiros e compañeiras do Salnés,máis da miña, terán lugar en Sanxenxo, na aula de informática do Centro de Día de Baltar, e nos telecentros de Meaño e O Grove.

Está preparado para o luns día 14 de maio un trivial por equipos, para o martes 15 un relato en rede e para o mércores16 unha xornada de xogos multimedia. Haberá unha serie de agasallos para os equipos gañadores tanto do trivial como do relato en rede.

Así que espero que vos resulten interesantes estas actividades e acudades ós diversos telecentros da comarca para pasar un rato entretido e agradable, xuntos coa vosa familia e amigos/as.

ABERTO O PLAZO DE INSCRIPCIÓN PARA OBRADOIRO DE WORD (NIVEL USUARIO)

2007-04-12T15:07:00.000+01:00

Como todos saberán, despois da visita por cada empresa dos polígonos, está aberto o prazo de inscripción para o Obradoiro de Word a nivel usuario que a Dinamizadora da Sociedade da Información da Asociación de Empresarios do Polígono Industrial do Salnés, pertencente á Rede de Dinamización que a Consellería de Innovación e Industria puxo en marcha, está a preparar.

Este obradoiro pretende ofrecer unha serie de nocións básicas para lograr un manexo deste procesador de textos. Os contidos que se abarcarán son: producción de textos, mover, copiar e pegar, formatear textos...

A idea é que teña lugar a partir da última semana de abril ou a primeira de maio. O horario programado sería de 20:00 a 21:30, sempre tentando adaptarse o máximo posible ás conveniencias dos usuarios. Aproximadamente, daríanse 6 sesións de clase que, dependendo do número de persoas interesadas en asistir, se realizarían unha ou dúas veces por semana.

Por eso, aqueles que esteades interesados/as en acudir a este obradoiro, apuntádevos, ou ben chamando por teléfono á Asociación de Empresarios, ou indo en persoa ó Edificio Multiusos, sede da Asociación, ou mandando un correo electrónico á dirección que aparece nos carteis que se entregaron en cada empresa.

Por último, sinalar que pensamos en realizar, logo de este, outros obradoiros como o de Excell, Power Point, Iniciación a internet e correo electrónico, etc, todos eles a nivel usuario.

A Dinamizadora da Sociedade da Información.

REALIZADA A PRIMEIRA CHARLA

2007-04-12T14:44:00.000+01:00

Xa tivo lugar a primeira das actividades realizadas na Asociación de Empresarios pola Dinamizadora da Sociedade da Información. Aconteceu o 28 de marzo e non foi outra que a primeira dunha serie de Charlas que están previstas. Nesta ocasión a Charla titulábase VANTAXES DO USO DAS TICS POLO TECIDO EMPRESARIAL.

A asistencia a ésta non foi demasiado numerosa, pero, dende logo, agradecer enormemente ós asistentes que acudiron, esperando que volvan á seguinte e que o número de asistentes sexa máis amplo.

Está pensado que a segunda destas Charlas se desenvolva na última semana de abril. Agora tócalle o turno á certificación e firma dixital, á factura e ó comercio electrónico. Cando definitivamente se coñeza a data da súa exposición serán avisados/as coa suficiente antelación, esperando, como dixen anteriormente, que o aforo sexa maior e resulte do seu agrado e interese.

A Dinamizadora da Sociedade da Información.

As TICs no tecido empresarial

2007-02-21T16:15:00.000Z

A SOCIEDADE DA INFORMACIÓN EN GALICIA

Actualmente, atopámonos nun momento de moitos cambios e no que ten prioridade o coñecemento, a aprendizaxe e o manexo da información, polo que nos situamos nunha sociedade cambiante denominada “Sociedade da lnformación”, que actúa como elemento de desenvolvemento social e de benestar para todos, permitindo a difusión do coñecemento a un menor custe e un acceso de todos os cidadáns á información, a novas oportunidades e a unha maior calidade de vida.

O desenvolvemento da Sociedade da Información e o Coñecemento é unha prioridade de
primeiro orde nestes momentos para Galicia como base para o seu desenvolvemento
económico e social, pois é evidente que existe unha clarísima fenda dixital con respecto a outras Comunidades Autónomas do Estado. Galicia está nunha situación de desvantaxa, quizais, por diferentes factores como poderían ser o avellentamento da poboación, a dispersión xoegráfica, diferentes hábitos de vida, etc.

Para poder paliar esta fenda dixital e introducir a Sociedade da Información na nosa Comunidade, a Xunta de Galicia está a desenvolver o Plano Estratéxico Galego da Sociedade da Información (PEGSI). Esta iniciativa da Consellería de Innovación e Industria busca fomentar o desenvolvemento dunha economía do coñecemento ata acadar a converxencia de Galicia cos obxectivos fixados pola Unión Europea na Estratexia de Lisboa, e nas sucesivas revisións deste programa.

Se nos centramos nas empresas e no emprego das Novas Tecnoloxías, as conclusións que podemos sacar veñen a ser as mesmas ou moi semellantes. Evidentemente, a situación non é igual cando se fai referencia a empresas grandes e pequenas. Pero, sobre todo, no noso contexto, existe un maior número de empresas pequenas. Hai unha elevada porcentaxe de empresas, sobre todo micropequemes e pequenas empresas, que non fan uso das TICs no seu traballo cotiá.

Pois ben, dentro deste PEGSI, antes citado, a Consellería de Innovación e Industria puxo en marcha a rede Dinamizadores da Sociedade da Información, co obxectivo de acercar as Tecnoloxías da Información e Comunicación (TICs) á cidadanía en xeral e, neste caso, ó tecido empresarial en particular. Rede de Dinamizadores á cal, por suposto, a Dinamizadora desta Asociación de Empresarios (e quen modestamente publica este blog), pertence. Este blog, polo tanto, é un exemplo máis deste acercamento, así que espero lles interese este artigo e se animen a facer algún comentario e participar.

BENVIDOS Ó NOVO BLOG!!!!!!!!

2007-02-21T12:11:00.000Z

BENVIDOS Ó NOVO BLOG DA ASOCIACIÓN DE EMPRESARIOS DO POLÍGONO INDUSTRIAL DO SALNÉS!!!!

Dende este novo espazo virtual que as Novas Tecnoloxías nos ofrecen, invítovos a todos e a todas a participar de éste e espero que resulte do voso agrado e interese.

Penso que, en primeiro lugar, e antes de nada, convendría dicir que é un blog, porque actualmente escoitamos falar de conceptos acerca de internet, etc, pero que, moitas veces, non sabemos que son en realidade. Pois ben, é moi sinxelo, un blog non é máis que un sitio web onde se recopilan cronoloxicamente mensaxes de un ou de varios autores, sobre unha temática en particular, sempre conservando o autor a liberdade de deixar publicado o que crea pertinente.

Pois ben, neste caso, este blog tendrá como tema principal as Tecnoloxías da Información e Comunicación no entorno empresarial.